Kryeministri Kurti nderon dëshmorët Dalip Behra dhe Bekim Gashi në përvjetorin e 26-të të rënies së tyre heroike
Në përvjetorin e 26-të të rënies heroike të dëshmorëve Dalip Behra dhe Bekim Gashi, Kryeministri në detyrë i Republikës së Kosovës, Albin Kurti, bëri homazhe në Krushë të Madhe, duke nderuar jetën dhe sakrificën e tyre në shërbim të lirisë së vendit.
Në fjalën e tij, Kurti tha se “jemi mbledhur për të kujtuar rënien e tyre si një akt sublim që e ndriçon të ardhmen e shtetit dhe shoqërisë sonë”, duke theksuar se idealet e dëshmorëve duhet të shërbejnë si udhërrëfyes për të gjithë qytetarët, pavarësisht pozitës apo rrethanave.
“Gjatë luftës, kënga e lirisë nuk u ndal. Dhe nuk do të ndalet as në paqe,” deklaroi ai, duke e cilësuar këtë si dëshmi të krenarisë që ndjen populli për të rënët dhe një kujtesë për përgjegjësinë që kemi për të vazhduar rrugën e tyre.
Kryeministri përmendi edhe figurat e shquara si Ukshin Hoti dhe Ismet Gashi, që sipas tij, kanë ndikuar në formimin dhe qëndresën e Dalip Behrës e Bekim Gashit. Ai theksoi rëndësinë e lidhjes ndërbrezore në ndërtimin e historisë kombëtare dhe udhëzimin për të ardhmen.
Kurti nënvizoi se luftëtarët e UÇK-së patën një mision të dyfishtë – të luftonin armikun dhe të mbronin popullsinë – mision të cilin e përmbushën me nder edhe dy dëshmorët e Krushës.
“Historia e Kosovës nuk është vetëm në libra, por e gjallë në çdo qytetar,” tha në fund Kurti, duke shtuar se afërsia në kohë e këtyre ngjarjeve e shton përgjegjësinë për të ruajtur sigurinë kombëtare, për të forcuar institucionet dhe për të mbrojtur çdo cep të vendit.
